¡ES QUE NO OS ESTÁIS QUIETOS!

El Comercio -05/07/2006. A estes altures ún empieza a preguntase si España, más allá de tou discutiniu sobre’l términu nación, tien futuru como estáu. El casu ye que nos díes que tamos viviendo podemos falar de la esistencia d’una crisis, buscada, de la Nación Española. Abasta con dedica-y unos pocos minutos a la realidá política inmediato pa decatase del emburrión que se-y aplica al edificiu constitucional. Y ello pasa cola xenerosa alianza de dellos nacionalismos y d’una izquierda desnortiada, prindada hasta’l tuétanu poles bisarmes del so pasáu más escuru. Hai dalgunos años podíemos afayar razones pal optimismu. Surdía, masque tímidamente, un debate sobre’l patriotismu constitucional, asuntu nada malu p’Asturies. Taba produciéndose un cansanciu social importante frente a los nacionalismos separatistes pola so inacabable reivindicación. A lo último, esistía un ciertu lideralgu sobre lo que se debía entender por Nación Española, abordándose un procesu de completamientu del Estáu de les Autonomíes, onde yá nun habría reformes sustanciales, y poro, faciendo posible qu’Asturies asumiera llogros yá algamaos poles mal llamaes nacionalidaes históriques.

Cola llegada del PSOE al gobiernu d’España, volvemos a la crisis permanente. Allugámonos nun peligrosu procesu de debilitamientu del Estáu, onde les partes que más puen sufrir son aquelles que como Asturies tienen poca viabilidá económica fuera del actual marcu de rellaciones interterritoriales definíu na Constitución. Cuando teníemos llograo avanzar democráticamente frente a los nacionalismos separatistes, la llegada al poder de los socialistes produz una involución, llevándonos otra vuelta al debate de la transición como si nun pasara’l tiempu. Xunto a ello, el proyectu de Rodríguez Zapatero afitaríase nel arrequexamientu del PP nel mapa políticu. El presidente socialista contempla a los nacionalismos separatistes como aliaos col oxetivu de gobernar nel estáu y nes comunidaes catalana, gallega y vasca. Niega la Nación Española por considerala una espresión del franquismu y, dende convicción tala, deduz que la idea d’España ye incompatible cola democracia. Facíase necesario entós, según esa lóxica, crear un estáu plurinacional. Y ansí, acabantes de ver el Nou Estatut catalán introducíu con vaselina na llegalidá, ente la indiferencia de los ciudadanos, ye cuando’l presidente Areces comunica na viéspora de San Xuan que-y da salida al so estatutu. Sí, y eso ye lo significativo, a la idea d’estatutu de so. El mesmu partíu que gobierna con fuerces independentistes en Cataluña y en Galicia, que s’empobina al gobiernu col mundu d’ETA nel País Vascu, que persigue ensin complexos al idioma español en Cataluña, o qu’acepta la presión galleguista sobre una parte d’Asturies, ye’l mesmu partíu que nagua por reformar el nuestru Estatutu d’Autonomía, afaláu por unes prieses non disimulaes pa facese rápido una semeya de l’aprobación que xustifique, ante los sos xefes de Madrid, lo bien obedientes que son los compañeros del socialismu asturianu. Y tamos falando d’una idea d’estatutu que, en dellos casos, faise pa quitanos autogobiernu. Viendo’l dictamen sobre la reforma del Estatutu d’Autonomía entregáu pol llamáu Consejo Consultivo de Asturias, onde taben dalgunos de los representantes más aventayaos del xacobinismu autóctonu, ún ve que les sos conclusiones son fiel reflexu de les opiniones de Vicente Álvarez Areces. Solo la parte referida a la cuestión llingüística yá amuesa una tesis, como mínimo, predemocrática. Envede ufiertar víes pa meyorar el marcu llegal de la llingua asturiana, que ye lo que-y correspondería facer, el mentáu Consejo dedícase a duldar de la entidá del asturianu, a relatar lo peligroso de toles midíes tomaes d’unos años a esta parte pa la so normalización, y a atacar la vixente Llei 1/98 de 23 de marzu d’Usu y Promoción del Asturianu, llei aprebada con votos del Partido Popular. Ye dicir, no tocante al asturianu, el Consejo d’Areces val p’amenorgar una parte fundamental de la identidá asturiana y p’atacar los avances nesti tarrén llexislaos pol partíu de la oposición.
Va pa munches décades, mientres daba un mitin don Antonio Maura Montaner, dalguién ente los asistentes gritó ‘¡No das una en el clavo!’, a lo que Maura replicó con un ‘¡Es que no os estáis quietos!’ Y paez como si la contestación d’esti políticu conservador pudiera considerase’l llema col que l’actual presidente asturianu resumiera’l so facer. Yá nun ye que se dea una en clavu cuando la realidá de la nuestra Comunidá Autónoma apínase de lleendes urbanes, de proyectos que nun son pa proyectase, d’estadístiques interpretaes al revés o de clientelismos más propios d’otres llatitúes o d’otres époques. L’asuntu, a lo que paez, ye que los asturianos nun nos tamos quietos. Solo d’esta miente ye a desplicase cómo, según aquellos que rixen políticamente los destinos del Principáu, podemos tar quemando al santu y llamando a misa dende’l campanariu.
Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s