LA LLINGUA ASTURIANA SÁLVASE… USÁNDOLA

hgonzalifacienda

Pue paecer una simplería pero la realidá amuésanos lo contrario. ¿Cuántos Xosé, Lluis, Xuan, Xuacu, Xandru.. conocemos qu’en verdá son José, Luis, Juan, Joaquín, Alejandro…? ¿Nun tuvimos munchos que sufrir les ‘llecciones’ d’esi neofalante qu’encesu aporfiaba con nós pola mor d’un neoloxismu de risión? ¿Nun vimos con plasmu cómo dalgún salvapatries iguaba al país en chigre pero ensin dexar de llanta-y tiempos compuestos al discursu? ¿Cuántes vegaes pernomaos académicos, intelectuales, activistes, pancarteros, políticos, artistes, profesores, sindicalistes, escritores…, fartucos de clamar pola oficialidá, después nun son p’asturianizar mínimamente la redolada onde trescurre’l so día a día? Nun voi ser yo’l que diga que llevar un nome non asturianu torgue’l compromisu cola llingua; ye más, ente los que nun lu tienen topé a la mayoría de los facedores d’una defensa práctica del asturianu. Tampoco nun-y negaré al neofalante nin el pan nin el sal, namás por que nun tuvieren como primer idioma al nuestru romance autóctonu; ellos han ser el futuru. Enxamás refugaré un rixu patrióticu que lluche pol porgüeyu d’esti país que se llama Asturies, por más que me fadien les babayaes d’una nueva fornada d’advenedizos. Nun estozinaré por pedir pa la mio llingua’l rangu oficial que-y correspuende, masque tenga compañes bien poco aconseyables nesi camín. Eso sí, enfotaréme testerón na propia perseverancia, y seguiré usando l’asturianu tolos díes, el normativu cuando toca, l’urbanu o amestáu les más de les vueltes, o inclusu les variantes llocales que me son familiares de la que m’afaye en llugar atopadizu pa ello. Falaré tamién n’español, como ye vezu, con normalidá y ensin rocea y, si hai oportunidá, unes cuantes llingues más que col tiempu llogré deprender. Y por eso mesmo, al que demande salvación pa la nuestra llingua, tando muncho d’alcuerdu con elli, encamentaré-y prudencia, responsabilidá, humildá y coherencia. Porque l’asturianu nun se salva solo glayando ‘oficialidá’. La llingua asturiana sálvase usándola; y usándola bien.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s