OTRA POESÍA N’ASTURIANU: NGUYEN BAO CHAN

Nguyen Bao Chan nación en H.aiphong, Vietnam, en 1969 . Graduóse nel programa d’Escritura y Edición de la Universidá de Cine y Teatru de H.anoi y, anguañu, trabaya como editora y guionista pa Vietnam Television. Tien publicao los llibros Dòng sông cháy –El ríu de fueu– (1994), Chân trần qua vệt rét –Pies desnudos sobre’l fríu – (1999) y Những chiếc gai trong mơ –Espines del suañu– (2010). Ye una de los cien poetes recoyíos n’antoloxía billingüe  La musa desafiante: Poemes vietnamites dende l’antigüedá hasta’l presente, espublizada en 2007.

LA MANO DE MIO PADRE

Amirando la palma de la to mano

veo les penuries del pasáu y del futuru.

Amirando la palma de la to mano

veo’l firmamentu de la mio infancia,

cuando inda podía esnalar a la lluna

y tolos mios suaños sedríen realidá.

¡Padre! El tiempu pasó.

Torné de los suaños a la vida.

Aguanté nes mios manos los ciñiscos

de los mios suaños estrozaos.

Mayelos pa protexeme,

afilelos pa calteneme viva,

triturelos otra vuelta,

por ser quién tovía

p’amar y tener esperances.

¡Padre! Si la mio vida se reficiera,

sé que tu dibes pañar los cachos

al pesar de que te tayaríen la palma de la mano,

al pesar de que te mancaríen la mano dafechamente.

MEMORIA

La memoria xuega al yo-espío
Con aquelles coses qu’unu recuerda

Afaya una muñeca de madera
Y suaña una biesca

Recueye un cascoxu
Y siente les foles del océanu

Ve l’allumada del sol naciente
Y esperimenta la tebieza de los besos

Raspia’l piel desnudo
Y ambura coles áscuares del amor

Sorbe la rosada de la nueche
Y sofre otra vuelta una sede vieya

Toca’l ríu
Y les ondes alluéñense

Guárdase
Y descubre’l cielu

Xira sobre ella mesma
Y cai nel abismu…

SILENCIU

Hai daqué que nun te puedo dicir.
Soi tan silenciosa como un guxán de seda
Filando una brillante febra.
Despliego el mio amor a les rellugues.
Texo’l mio amor nel interior de la lluz.
Tu yes el lloviu impaciente
Qu’amoyenta la seda que filo.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s